Zuk esan

Garraiolarien greba: Histeria gehiegi?

Tue, 10 Jun 2008 08:55:23 +0000

Gaur garraiolarien grebaren bigarren eguna da, baina hasieratik hornikuntza arazoak izan dira dendetan eta gasolindegietan, kontsumitzaileak ahalik eta gehien erosten saiatu baitira.

Histeria gehiegi dagoela uste al duzu? Zuk ere hilabete osorako elikagaiak erosi dituzu? Eman iritzia eta azaldu zure kasua.

Kontsultaren bi galderak ezagunak dira jada

Wed, 28 May 2008 10:12:29 +0000

Urriaren 25eko kontsultan gizarteari egingo dizkion bi galderak aurkeztu ditu gaur Juan Jose Ibarretxe lehendakariak:

1. Ados al zaude indarkeriari elkarrizketa bidez amaiera emateko prozesu bat bultzatzearekin, baldin eta ETAk aldez aurretik erakusten badu zalantzarik gabeko moduan indarkeriari behin eta betiko amaiera emateko borondatea?

2. Ados al zaude euskal alderdiek, bazterketarik gabe, Euskal Herriaren erabakitzeko eskubidea gauzatzeari buruz Akordio Demokratiko bat lortzeko negoziazio-prozesu bati ekitearekin, eta akordio hori 2010. urtea bukatu baino lehen erreferendumera jartzearekin?

Ados zaude galderekin? Zer bozkatuko zenuke? Eman iritzia.

Kaosa A-8an enegarren aldiz

Mon, 5 May 2008 10:22:27 +0000

13 kilometroko auto-ilarak eratu dira gaur goizean Arrontegin, bost ibilgailuren artean izandako istripu baten ondorioz. Hori dela eta, milaka gidari errepidean harrapatuta izan dira zenbait orduz.

Zu horietakoa izan zara? Eman iritzia A-8an izan den azken kaosari buruz.

Kokoteraino zaude lankideren batekin?

Thu, 15 Nov 2007 11:44:26 +0000

Lasai, badirudi asko eta asko daudela zu bezala. Izan ere, ikerketa baten arabera, 'langile toxiko' gisa definitu dituzten zazpi kategoria daude: gatazkatsuak, alferrak, sarritan lanera joaten ez direnak, ezgaiak, lapurrak, nagusien aurkako jarrera dutenak eta harroputzak.

Ikerketa nagusien ikuspuntutik egin dute; ziur, ordea, zuk ere baduzula lankide goranahiren bat, alferra, pedantea... Beste kategoriarik otutzen zaizu?

El Mundo-ren 'mundua'

Tue, 13 Nov 2007 09:21:15 +0000

"Entre abertzales y a la carrera" izenburupean, Behiobia-Donostia lasterketa ezagunaren ikuspegi propioa eman du El Mundo kazetak.

Berriz ere telefono zerbitzu gabe

Mon, 12 Nov 2007 07:58:11 +0000

Azkenaldian telefonia kableen lapurreta ugari izan da, Gipuzkoako hainbat udalerritan batez ere. Azkena gau honetan izan da, Zaldibian.

Lehendakaria eta beste politikari batzuk kartzelara joan litezke elkarrekin hitz egiteagatik

Tue, 30 Oct 2007 11:41:11 +0000

Juan Jose Ibarretxe lehendakaria, Patxi Lopez eta Rodolfo Ares sozialistak eta Batasuneko bost kide epaitzea erabaki du EAEko Auzitegi Nagusiak, bakea lortzeko xedez bilerak egiteagatik.

Hitz egitea, delitua ote?

Eman iritzia.

Vall d'Hebrongo bortxatzailea espetxetik atera da

Sat, 22 Sep 2007 09:37:25 +0000

Jose Rodriguez Salvador, 'Vall d'Hebrongo bortxatzailea' ezizenaz ezaguna den gizona, kartzelatik atera da gaur goizean. 311 urteko espetxe zigorra ezarri zioten 17 emakume bortxatzeagatik, baina 16 bete ditu.

Legearen arabera zegozkion urteak eman ditu kartzelan, baina bere psikologoek esan dute berriro ere bortxaketak egiteko aukera oso handia dela.

Zer irizten diozu? Zer egin beharko litzateke tankera honetako auzietan?

Madrilek inposatutako Gobernua

Fri, 3 Aug 2007 12:58:33 +0000

Nafarroako sozialistek NaBairekin eta NEBekin gobernatzea erabaki zuten, baina PSOEk, Madrilen, UPN gobernatzen uztera behartu ditu.

Zer irizten diozu?

Emakumeentzako entzierroak berdintasuna bultzatzen duela deritzozu?

Mon, 9 Jul 2007 11:09:31 +0000

Emakume talde batek San Ferminetan eurentzako propio antolatutako entzierroa eskatu du, zezenen ordez behiak izango dituena.

Honelako entzierroek gizonen eta emakumeen arteko berdintasuna bultzatzen dutela deritzozu? Emakumeek ohiko entzierroetan parte hartzeko gizonek baino gaitasun gutxiago dutela deritzozu? Edota animaliek sufritu egiten dutela eta mota honetako ekimenak ez liratekeela bultzatu behar uste duzu? Konta iezaguzu.