Agur t’erdi,
Blog berri bati hasiera emateko garaia iritsi zaigu oraingoan. HUHEZI fakultateko ikasleak gaituzue (Eskoriatza). Aukera askeko kredituak bete asmoz, “euskaldunak munduan zehar ” izeneko ikasgaian izena ematea erabaki genuen gutariko askok.

Ikasgai honek, munduarekiko, eta batez ere munduan zehar aurkitzen diren euskaldunekiko, beste ikuspegi are eta zabalago bat izateko aukera eskaini digu. Hasieran, ez genekizkien ikasgaiaren nondik- norakoak zein izango ote ziren. Hala ere, egunak aurrera egin ahala, ikasgaia beraren sekretu txikiak deskubritzeari ekin genion. Aitortu beharrean gara, lehen eguna zertxobait berezia izan zela,  “euskaldun” izatearen inguruko hausnarketarekin ekin baikenion. Beti esan izana da, euskalduna, hizkuntzarekin erlazionatzen dela zuzen-zuzenean. Hala ere, ikasgai honek hori gezurtaraztera eraman gaitu. Hizkuntza ez ezik, sentimendu, arraza, jatorriak… ere garrantzia dutela azpimarratu nahi dugu.

Ikuspegi aldaketa guzti hau ez da bi egunetako kontua izan, euskal diasporarekin kontaktu zuzena duen jendearen bisita ere izan dugu geurean. Benetako esperientzia aberasgarria izan da, pentsamolde desberdinak ikusteko eta sentitzeko aukera izan baitugu.

Gure blog honetan ikasitako eta bizitako guztia plasmatzen saiatuko gara. Espero dugu zuen iritziak ere bertan idaztea eta informazio berria gurekin partekatzea.

Besterik gabe, gustatuko zaizuelakoan

Enara Goikoetxea, Ione Garai, Leire Agirre, Amaia Elkoro-Iribe, Maite Otxoa, Aiora Iturripea, Eneritz Legarreta, Zuriñe Uriagereka eta Ane Ayerbe.