Elhuyar Fundazioak, Innobasquek eta Eusko Jaurlaritzako Hezkuntza,
Unibertsitate eta Ikerketa Sailak Teknoskopioa 2008 gazteentzako ideia-lehiaketa jarri dute abian.

Hiru erakundeek Zientziaren, Teknologiaren eta Berrikuntzaren Astearen baitan (azaroaren 10etik 16ra egingo dute aurten) antolatuko dute lehiaketa.

Antolatzaileek jakinarazi dutenez, lehiaketaren helburua zientzia eta teknologiarekiko zaletasuna eta jarrera ekintzaileak gazteen artean sustatzea eta ikasleak motibatzea da. Horregatik, lehiaketak irauten duen bitartean, gazteak ikertzaile, asmatzaile eta sortzaile bihurtuko dira.

Teknoskopioan, 14 eta 18 urte arteko neska-mutilek har dezakete parte, gehienez hiru laguneko taldeetan antolatuta. DBHko bigarren zikloko, Batxilergoko eta Lanbide Heziketako ziklo ertaineko ikasketak egiten ari diren ikasleentzat prestatutako lehiaketa da, eta aurtengoa bosgarren edizioa du.

Gaia: superheroiak

Edizio honetan, parte-hartzaileak superheroi bihurtuko dira. Mundua salbatuko duen superheroi baten azalean jarri beharko dute, eta superheroi horren bloga sortu. Superblog horretan, superheroiak mundua salbatzeko bizi izan dituen ekintzak eta abenturak kontatu beharko ditu.

Ideia-lehiaketa honi buruzko informazio guztia www.zientzia.net/teknoskopioa webgunean dago.