Apple etxeak mp3 irakurgailurik meheena eta beste eredu berri batzuk ezagutarazi ditu. Berrikuntzekin salmenta erritmoari eustea espero du enpresak.

IPod irakurgailuaren modelo ia guztiak berriztatu ditu Apple etxeak eta iTunes izeneko denda digitalaren 8. bertsioa ere aurkeztu du. Azken horrek musika, telebista saioak eta beste zenbait baliabide eskaintzen dizkie erabiltzaileei.

Aldaketa nagusiak iPod Nano izeneko modeloak izan ditu, egungoa baino meheagoa izango da eta pantaila kurbatua izango du, eta aparailua mugitzean argazkien posizioa ere aldatzen da.

IPod berriak koloreak ere aldatzen ditu, oraingo kolore argiek indartsuei uzten diete lekua. Funtzio berriak ere baditu, abestien zerrendak osatzeko aukera, adibidez.

IPod Touch modeloa ere berritu dute. IPhone telefono ezagunaren oso antzekoa da, bai itxuran eta baita edukiei dagokienez ere, bideo-jokoak, Internet eta beste zenbait aukera eskaintzen ditu.

IPod Classic ereduak bere izenari ohore egiten dio, eta hori da aldaketarik gutxien dakarrena. Apple etxeak 160 Gb-eko eredua egiteari utziko dio eta 120 Gb dituen ereduari prezioa jeitsi egingo dio.

Apple etxeko kontseilari delegatuak, Steve Jobsek, esan duenez, 160 miloi iPod saldu dira munduan 2001. urtean agertu zenetik. Eguberriei begira, eta berrikuntza hauen aurkezpenarekin, salmenta mailari eustea espero dute.