Googlek Interneten hedatzen jarraitzen du (gehiago posible ote?). Gaur bertan, AEBetako ordutegian, doako nabigatzaile bat kaleratuko du, Microsofti aurre egiteko, Explorer nabigatzailea nagusi baita merkatuan.

Nabigatzaileak Chrome izango du izena eta, hasieran, beta bertsioan baino ez da izango eskuragarri, 100 herrialdetan inguru, Googleko enpresaburuek beraiek blog ofizialean iragarri dutenez.

Dena dela, lehen bertsio hori bidearen hasiera baino ez dela esan dute, foro bat martxan jarri nahi baitute, erabiltzaileen artean nabigatzailea nola hobetu eztabaidatzeko. Ondoren, behin betiko bertsioa kaleratuko dute.

Googlek berak komiki baten bidez azaldu ditu nabigatzaile berriaren zehetasunak.

Adibidez, Chromek izango duen berritasunetako bat egonkortasunarekin dago lotuta. Izan ere, konpainiatik azaldu dutenez, hainbat webgune zabalik baditugu, eta horietako bat blokeatzen bada, ez da nabigatzaile osoa blokeatuko.

Gainera, programa kode irekikoa izango da, eta edozeinek aplikazioak egiteko aukera izango du, Googleren beste hainbat produkturekin gertatu bezala.

Mac ordenagailuetarako eta Linux sistema-eragilearentzako bertsioak ere kaleratuko dituzte.

Kolpea Microsofti

Hedabide ekonomikoen ustez, Microsoften lurretan barrena egiteko mugimendua egin du Googlek, Bill Gatesen konpainia Windows sistema-eragileari eta Explorer nabigatzaileari esker egin baita erraldoi.

Gaur egun, Microsoftek nabigatzaileen merkatuko %72 dauka. Ondoren Mozilla dago Firefox sistemarekin (%20) eta hirugarren Apple bere Safarirekin (%6,4).

EGUNERAKETA 2008/09/03: Chromeren beta bertsioa jada dago eskuragarri (link).