Espainiar Estatuan oraindik indarrik ez daukaten arren, hainbat herrialdetan liburu digitalek arrakasta handia lortu dute.

Formatu berriak idazlearentzako abantaila handia suposatzen du, izan ere, Javier Celaya editoreak esan duenez, euskarri berriarekin salmenten etekinen %80 jasoko luke.

“Gainera, teknologia berriekin editorialek paperezko salmenta hobeak izango lituzkete” azaldu du Celayak, Dosdoce.com atariko bazkideak.

Harper Collinsek esaterako, salmentak %30 igotzea lortu du “erabiltzaileei liburua merkaturatu aurretik 30 egunetan sarean debalde irakurtzeko aukera eskaini ondoren”.

Estrategia berri honi, Internet bidez idazleen giza-sare bat sortu eta euskarri ezberdinetan liburuak saltzeko aukera gehitzen zaio, hots, normala, patrikakoa eta digitala.

Celayak eman duen beste datu adierazgarri bat da Hachettek 2007an saldu zituen liburuen %6 elektronikoak izan zirela.

Amazonek, bestalde, urte bakar batean milioi bat Kindle saldu ditu. Kindleak eskuko gailu batzuk dira, eta bertan liburuak pilatu eta irakurri daitezke. Oraindik ez dago Europan salgai, baina webaren bidez eros daiteke.

E-book hau erabiltzeko, Applek Ipodarekin lehenago egiten zuen bezala, gune zehatz batetik jaitsi beharko dira edukiak.

Espainian, oraindik orain, merkatu berri hau ikertzen ari dira, baina Celayak esan duenez, “editorial espainiarrak ez dira batere berritzaileak”.

Idazleak eskubideak galdu eta pirateria delituen inguruan dagoen beldurrari dagokionez, Celayak azaldu duenez, euskarri digital honek “lanak babesteko beste teknologia badauka”.