Noizbait NASArekin lan egitea pentsatu baduzu, orain izan dezakezu aukera: estatubatuar agentziak, munduko aurreratuenak teknologia aeroespazial arloan, txiza emaileak behar ditu.

Langileei bidali dieten posta elektroniko baten arabera, NASAk txiza berehala behar du, komun-ontzi espazial baten diseinua egiteko. Komuna Orion programaren baitan egingo dute, 2020 urtean Ilargira tripulazioa bidaltzeko helburuz. Agentziak langileei eskatu die laguntza, baina NASAko egoitzara (Houston, Texas) gerturatzen diren bisitarien ekarpenak ere izango dira ongietorriak.

Izan ere, NASAk 30 litro txiza behar ditu egunero esperimentuak garatzeko. Zehazki, agentzia produktu kimikoekin lanean ari da partikulak mikrograbitate egoeretan traba ez daitezen, esan du Leo Makowskik, Hamilton Sundstrandgo (espaziorako komun-ontziaren diseinua egiten ari den enpresa) enpresako bozeramaileak.

Laborategian gizakiaren txiza sortzea oso zaila denez, emaileetara jotzea erabaki dute. "Mesedez, ez eman 350 mililitro baino gehiago egunean", aholkatzen du mezuak. Gainera, txiza eguneko lehenengoa izan behar dela diote.