3001pc enpresak Euskadiko ordenagailurik zaharrena aurkitzeko lehiaketa antolatu du. Trasteleku, ganbara eta etxeko bazter guztietan bilatzeko ordua da, ordenagailurik zaharrena aurkeztu eta saria irabazi ahal izateko: eskuko ordenagailu bat.

Nahi beste ordenagailu aurkez ditzake partehartzaileak, baldintza garrantzitsu bat bakarrik bete beharko du: behar den bezala ibili behar da. Ordenagailu motari dagokionez, ez dago mugarik, PCak, Spectrumak, eskuko ordenagailuak… aurkez daitezke.

Zorionez, irabazten ez dutenek beste aukera bat izango dute, partaide guztientzat bigarren ordenagailu bat zozkatuko baitute.

Aurkeztutako bi ordenagailu urte berekoak badira, ezaugarri teknikoek baldintzatuko dute irabazlea. Partaideak Araban, Gipuzkoan edo Bizkaian bizi behar dira eta ordenagailuak uztailaren 31 baino lehenago aurkeztu behar dira.

Aurkeztutakoen artean, ordenagailu zaharrak aurkeztu dituzte benetan, Sinclair ZX81 horren adibide, Spectrum ordenagailua baino zaharragoa. ZX81 horren ezaugarrien artean: kolore eza, soinu eza eta 8kbeko RAM memoria.