Elhuyar Fundazioaren Basque Research web guneak VI. Tesi Saria jarriko du martxan maiatzaren 1ean. Unibertsitatean egiten den ikerketa gizarteratzea eta, batez ere, ikertzaile gazteen lanak ezagutaraztea dira sariketaren helburu nagusiak.

Hori horrela, 2007an doktore-tesia amaitu eta gainditu duten ikertzaileen lanak saritu nahi ditu Basque Research web guneak, betiere zientzia edo teknologia gaietakoak badira.

Hiru sari banatuko dira: sari nagusia, bigarren saria eta aipamen berezia. Sari nagusiaren irabazleak ordenagailu eramangarri bat jasoko du. Bigarren sariaren irabazleak, berriz, argazki-kamera digital bat eskuratuko du. Azkenik, aipamen berezia jasotzen duen lanak MP4 bat jasoko du.

Gainera, saridun guztiek Euskal Autonomia Erkidegoko landetxe batean bi lagunentzako asteburu bana jasoko dute.

Lanak aurkezteko epea maiatzaren 30ean amaituko da, eta oinarriak dagoeneko eskuragarri daude Basque Research web gunean. Euskal Herriko Unibertsitateak babesten du sariketa hau.