Elhuyar Fundazioaren eskutik

Zientzialariek ez dakite zergatik duten hain isats luzea pauma arrek, eta nondik nora aukeratzen duten pauma emeek ar bat edo bestea ugaltzeko garaian. Japonian egindako esperimentu berri batek ezeztatu egin du orain arte egiatzat jotzen zen teoria.

Orain arte uste zuten biak lotuta zeudela; alegia, pauma emeek isats luze eta apainduak gustuko zituztelako aukeratzen zutela bikotekidea. Darwinek proposatu zuen teoria hori, hautespen naturalaren bidez ezin baitzuen azaldu pauma arren ezaugarri hori. Izan ere, pauma arren isatsa haien gorputza baino luzeagoa da, eta neurriz gaineko apaingarriak ditu. Arrak energia handia inbertitu behar izaten du itxuraz ezertan laguntzen ez dion zerbaitean. Eta, hala ere, ar guztiek izugarri isats luzea dute.

Teoria hori baieztatzeko asmoz, paumen arteko 268 estalketa behatu zituen Tokioko Unibertsitatean animalien portaera aztertzen duen talde batek. Eta, espero zutenaren kontra, ikusi zuten emeek ez zutela ezaugarri jakin bat bilatzen estaltzeko aukeratzen zuten pauman.

Hori ikusita, arrek horrelako isats luzea zergatik garatu zuten azaltzen saiatu dira. Uste dutenez, garai batean bai, emeek garrantzia ematen zioten arren isatsaren itxurari, baina, orain, modatik joan den ezaugarri bilakatu da, nonbait.

www.zientzia.net