Zientzialari talde batek orain arte ezezaguna zen dinosauro belarjale espezie baten hondarrak aurkitu du Coahuila basamortu mexikarrean.

Espezie berriko animaliak zazpi bat metroko altuera zuen, trizeratopsa baino pixka bat txikiagoa, baina bere adarrak tamaina berekoak ziren, ia metro bateko luzerarekin. Gaur egun basamortua den Coahuila orduan ozeanoaren azpian zegoen, eta dinosauro espezie ezberdinak bizi ziren kostaldean.

Paleontologo taldeak Rincon Colorado herrian iragarri du dinosauro berriaren existentziaren frogen aurkikuntza. Dirudienez, trizeratopsarekin ahaidetuta dago dinosauro berria; trizeratopsa Lurrean inoiz izan den animali buruhandiena bezala ezaguna da.

Dinosauroak duela 72 milioi urteko hondartza basati batean bikotea aurkitzen eta harrapariei aurre egiten laguntzen zioten lepo handia eta hiru adar luze zituen.

Litekeena da dinosauroak adarrak erabiltzea harraparien aurrean defendatzeko, baina adituek uste dute bere buru eta lepo nabarmenak garrantzitsuak zirela espeziearen estalaldian, gaur egun antilopea bezalako animaliek borroketan erakusten duten nagusitasuna erakutsita.

Mexikon bataiatzen duten dinosauroen bigarren espeziea izango da; izan ere, joan den otsailean, zientzialariek Velafrons Coahuilensis izena jarri baitzioten eskualde berean aurkituriko dinosauro bati.

Dinosauro berriaren izen zientifikoa ez dute urte bukaerara arte iragarriko, ikertzaile mexikarrekin batera aurkikuntzan lagundu duen Scott Sampson Utahko Historia Naturaleko Museoko komisarioak jakinarazi duenez.