Atzodanik Bizitzaren Entziklopediaren (ingelesez EOL, 'Enclyclopedia of Live') lehen 30.000 orrialdeak daude ikusgai Interneten. Anbizio handiko proiektua da, Lurrean dauden bizitza forma guztien inguruko kalitatezko informazioa ematea baitu helburu. Naturaren inguruko Wikipedia antzeko bat litzateke, nolabait esatearren.

Proiektuaren lehen fasea da martxan jarri dena eta 2017rako 1,8 milioi espezieren datuak biltzea du asmo. Horretarako, munduko dozenaka zientzialarien eta ikerketa zentroren laguntza du eta internautek ere euren ekarpenak egin ditzakete (betiere zientzialariek gainbegiratuko dituzte ekarriok).

Proiektuaren sustatzaileen esanetan, zientzialarien, erakundeen eta naturari buruz interesa duen lagun ororen erreminta izango da Bizitzaren Entziklopedia.

Giza gaixotasun baten bektoreak, bizitzaren luzeraren misterioak eta landareen polinizazioa sustatzeko neurriak ezagutzeko aukera emango du ekimenak.

Hala, garapen bidean den herrialde batek gaixotasun arraro bati aurre egin behar badio edo soroak hondatzen dituen kakalardo inbasioa badu, entziklopedia kontsultatu ahalko du arazoa konpontzeko.