Yahook Googlekin hitzarmena lortu dezake, Microsoftek egindako eskaintzari aurre egiteko. 44.600 milioi dolar (29.930 milioi euro inguru) eskaini zizkion joan den astean Microsoftek Yahoori.

The Wall Street Journal egunkariak gaur argitaratu duenez, Googleko presidentea, Eric Schmidt, Yahooko idazkariarekin, Jerry Yangekin, jarri da harremanetan, Microsoften eskaintzaren aurrean babesa eskaintzeko.

Yahoo hainbat aukera aztertzen ari ei da, eta horien artean legoke Googlena, adituen arabera. Joan den ostiralean Microsoften eskaintza aztertu zuen Yahooren zuzendaritzak, baina ez zuen erabakirik hartu.

The Wall Streen Journalen arabera, “ezinezkoa” da Googlelek “kontra-eskaintza” bat egitea, monopolioaren aurkako behatzaileek ez luketelako ontzat emango, Googlek bilatzaileen merkatuan duen nagusitasunagatik. Dena dela, baliteke Googlek Yahoori laguntza eskaintzea, beste konpainia batekin akordioa lortu eta bere independentzia mantendu ahal izateko.