Tanzaniako Udzungwa mendietan, ugaztun intsektujaleen espezie berri bat aurkitu du oraintsu zientzialari talde batek. Antilope eta hartz inurrijale txiki baten arteko nahasketa bat dirudi eta Rhynochocyon udzungwensis izena jarri diote.

Espezie berriak katu baten tamaina du, 700 bat gramo pisatzen ditu eta 30 zentimetroko luzera du, Journal of Zoology aldizkarian argitaratutako ikerketaren arabera.

Elefante-satitsuen familiakoa da baina satitsuekin ez du erlaziorik, bai, ostera, elefantea, manatia eta hartz inurrijalea bezalako ugaztun afrikarrekin.

Koloreetan aberatsa

Dena dela, adierazgarriena eta zientzialarien arreta bereganatu duena animaliaren kolorea da. Aurpegi grisaxka, anbar koloreko gorputz handia, mutur luze eta malgu bat eta hanka luze eta ahul batzuk ditu espezieak.

Animalia muturraz baliatzen da intsektuak harrapatzeko, termitak bereziki, eta egunsentitik ilunabarrera arte aktibo dago.

Udzungwa mendietako basoetan espezie ezezagun ugari aurkitu dituzte