YouTube webgune ezagunetan edo Emule bezalako programen bidez irudiak zein artxiboak sartzeagatik edo trukatzeagatik euren eskubideak urratu zituztela estimatu zuten herritarren salaketak lehen aldiz jaso zituen Datuak Babesteko Espainiako Bulegoak iaz, Artemi Rayo Agentziaren zuzendariak jakitera eman duenez.

Iaz babesa eskatzeko 900 salaketa inguru jaso zituen bulegoak, 2006 urtean jasotakoen bikoitza, alegia. Artemi Rayoren arabera, herritarrek lege horren inguruan duten kontzientziazioa handiagoa dela erakusten du datu horrek.

Datuen babesean arau-hauste gehien izaten dituzten sektoreak telekomunikazioak eta banku-jarduera dira, salaketen %90 esparru horietan ematen baitira. Normalean, ur, gas eta telefonia zerbitzuak kontratatzeko datu pertsonalak iruzurrez bereganatzeagatik edota bezero berankorren fitxategietan arauz kontra sartzeagatik ematen dira salaketak.

Internetetik at ere, datuen babesaren aferan bideozaintza sektoreak ere protagonismoa bereganatzen ari da. Sistema horien erabilera desegokia dela eta, salaketak gero eta gehiago dira. Era berean, bideozaintza lan munduan, merkataritzan eta komunikabideetan gero eta ageriagoan egoteak arau-hausteak gehitzea eragin du.

Datuen babes gaietan enpresari zein norbanakoei ezarri ahal diezazkien isunak 600 eurotik 600.000ra joan daitezke. Artemi Rayoren hitzetan, 300 bat isun ezarri zituzten iaz.