Zientziari buruzko hitzaldi zikloa abiarazi du Ikerbasque Fundazioak, Donostian, Gasteizen eta Bilbon. Zikloari asteazkenean, urtarrilak 30, emango diote hasiera, Bilboko Euskalduna Jauregian. Asturiasko Printzea Saria irabazi duen Antonio Damasio neurologoak eskainiko du sarrera-hitzaldia, Burmuina eta adimena: gaixotasunetik gizartera izenburupean.

Ikerbasque Foroak sona handiko hizlariak izango ditu. Lehenengoa, Antonio Damasio, Portugalen jaio eta Estatu Batuetan bizi den mediku eta ikertzailea, 2005ean Ikerketa Zientifiko eta Teknikoaren alorreko Asturiasko Printzea Saria irabazi zuena Parkinson eta Alzheimerraren aurkako borrokan egindako ekarpenagatik.

Ikerbasque Foroa ekimenak jarraipena izango du datozen asteotan, nazioarteko adituek EAEko hiru hiriburuetan eskainiko dituzten hitzaldi berrien bitartez, matematika, hizkuntzalaritza, fisika eta klima aldaketa bezalako alorretan gauzatu diren azken ikerketen berri emateko.

Ikerbasque Eusko Jaurlaritzako Hezkuntza, Unibertsitate eta Ikerketa Sailak 2007an sortutako fundazioa da. Euskadiko administrazioek eta enpresek I+G+b alorrean egindako ahalegina indartzea du xede.