Matematikako 44. Olinpiadako lehenengo fasea (eskualde mailakoa) ospatuko dute ostiral honetan, 09:30etatik aurrera, Euskal Herriko Unibertsitatean (EHU).

Matematikako Olinpiada Espainiako Matematika Elkarteak antolatzen du, eta lehen fase horretan 2007-2008 ikasturtean Batxilergoan matrikulaturik dauden Euskal Autonomia Erkidegoko ikasle guztiek parte har dezakete.

EHUko iturriek adierazi dutenez, frogak Bizkaiko campusean egiten ziren, baina aurten, lehenengo aldiz, hiru campusetan egingo dira, hain zuzen ere, Zientzia eta Teknologia Fakultatean (Leioako campusa), Las Nieveseko 1P13SG ikasgelan (Arabako campusa) eta Ignacio Maria Barriola eraikineko 203 ikasgelan (Gipuzkoako campusa).

Lehenengo fase horretan lehiakideek hiru problema ebatzi behar izango dituzte goizean (09:30etatik aurrera) eta beste hiru arratsaldean (15:00etatik aurrera).

Saio bakoitzean hiru ordu izango dituzte hiru problemak ebazteko. Frogak euskaraz edo gaztelaniaz egin daitezke, eta idazteko eta marrazteko tresnak baino ezin dira erabili, hau da, kalkulagailuak, liburuak, taulak eta bestelako dokumentuak debekatuta daude.

Lehen postua lortuko duenak 380 euro jasoko ditu, bigarrenak 285 euro eta hirugarrenak 220 euro. Gainera, hiru irabazleak bigarren fasera (Estatu mailakora) igaroko dira.