Astelehen honetan jarri da martxan Wikia Search, Wikipedia entziklopediaren fundatzaileak sortutako Interneteko bilatzaile berria. Proiektu hau helburu batekin jaio da: erabiltzaile guztientzako erabilgarria izango den bilatzaile gardena izatea.

Beste bilatzaile batzuekin alderatuta, erabiltzaileen parte-hartzean oinarritzen da Wikia Search. Hala, erabiltzaileek sistema kontrola dezakete bilaketen emaitzak ordenatzeko eta baloratzeko.

Jimmy Wales Wikipediako sortzaileak adierazi duenez, Interneteko bilaketek "irekiagoak eta gardenak" izan behar dute eta atari berriaren xedea, hain zuzen ere, horixe da, erantsi duenez.

Google enpresa, bere aldetik, Interneteko Wikipedia entziklopediarekin lehian arituko den zerbitzu bat garatzen ari da. Bertan, erabiltzaileak zenbait gairi buruzko artikuluak idazteko aukera izango dute.