2007 urtea amaitzear da eta, hortaz, balantzea egiteko garaia da. YouTube bideoak gordetzeko eta erreproduzitzeko webgune ezagunak ere berea egin du, eta aurtengo bideorik arrakastatsuenak zeintzuk izan diren jakinarazi du.

Hiru izan dira 2007ko izarrak: Obama neska, Briteny Spears abeslariaren jarraitzaile bat eta bufaloen eta lehoien arteko borroka bat.

Sailkapena hautatzeko, bisita kopurua ez ezik, bideo partekatuenak, iruzkin gehien dituztenak, nota onena dutenak eta, oro har, ezagunenak direnak ere kontuan izan dituzte. Denen ahotan dauden bideoak zeintzuk diren jakitea zen helburua.

Barely Political erabiltzaileak sortutako bideo hau 2007ko erregea izan da YouTuben. Horretan, neska gazte lirain bat agertzen da, Etxe Zurirako Alderdi Demokrataren hautagaia izateko lehian dagoen Barack Obama senataria maite duela aitortzen.

Bideoak 4 milioi bisita baino gehiago izan ditu jada eta telebistan ere hainbat aldiz agertu da.

Britneyren jarraitzailea

"Leave Britney Alone" (Utzi Britney bakean) izenburudun bideo honek gazte bat erakusten du, negar eta hedabideak eta paparazziak pop abeslariaren egoera kaskarraren erruduntzat jotzen.

Bideoari esker, Chris Crocker (kliparen egilea) ospetsu egin zen berehala sarean. 14 milioi pertsonak ikusi dute jada, eta iruzkin gehien dituen laugarren bideoa da YouTuberen historian.

Animalien borroka

Baina hiru bideoen artean, ikusgarriena "Battle at Kruger" (Bataila Krugerren) izena duena da. 21 milioi bisita izan ditu honezkero.

Jason Schlosbergek grabatu zuen, Hegoafrikan safaria egiten ari zela. Bideoan lehoi- eta bufalo-talde bi ikus daitezke, bufalo txiki batekin geratzeko borrokan.

Irudi horiekin, Schlosbergek dokumentala egin du eta udaberrian National Geographicen kateak igorriko du.