Greenpeacek 0 bat eman dio Nintendori, bere bi kontsola izarrak, Wii eta DS, egiteko erabiltzen duen materialarengatik. Philipsek 2 bat besterik ez du lortu eta Microsoftek 3.

Sony Ericsson eta Samsung dira ingurugiroa gehien zaintzen duten elektronika-produktu ekoizleak. Hala dio Greenpeace erakunde ekologistak argitara eman duen zerrenda batek. Azken postuan Nintendo dago, 0 batekin.

Sony Ericssonek eta Samsungek bakoitzak 7,7ko puntuazioa lortu dute, 10eko eskalan. Nota hori emateko, marka horietako sakelako telefonoak, ordenagailuak, telebistak eta joko-kontsolak aztertu ditu erakunde ekologistak.

Azken hiru postuetan, hau da, ingurugiroari errespetu gutxien diotenetan, Microsoft (3 puntu), Philips (2 puntu) eta Nintendo daude (0 puntu).

Nintendo Japoniako taldea zerrendan azkena izatearen arrazoia erabiltzen duen materiala da. Izan ere, Wii eta DS ezagunak egiteko PVCa erabiltzen du. Bere kabuz ez da toxikoa plastiko hori baina ezinezkoa da hori birziklatzea eta errez gero izugarrizko isuri toxikoa sortzen du, dioxinak, batez ere.

Microsofti ere kritika gogorrak egin dizkio Greenpeacek Xbox 360 egiteko erabiltzen duen materialagatik.