iPhone, AEBetan arrakasta handia izaten ari den telefonoa, 2007ko asmakizunik onena izendatu du Time aldizkari estatubatuarrak. Apple konpainiak 1,4 milioi telefono saldu ditu herrialde hartan. Hurrengo astean Europara helduko da.

Aldizkariaren ustez, iPhone “handiegia” eta “garestiegia” da eta ez du Outlook programa erabiltzen uzten, “baina hala eta guztiz ere, aurten asmatu den makinarik onena izaten jarraitzen du”.

Timesek zenbait arrazoi eman ditu bere erabakia argudiatzeko.

Lehenengo, Applek diseinua zaindu egin duela dio, “konpainia teknologiko gehienek egin ohi ez bezala”.

Tramankuluaren pantaila ukigarria dela ere azpimarratu du. Hori ez du Applek asmatu, baina “inork baino hobe” erabili duela gaineratu du.

Gainera, telefonoa baino, “plataforma” bat dela adierazi du agerkariak, “ordenagailua” bezalakoa delako eta “edonora” eraman dezakezulako.

Eta, batez ere, iPhonek potentzial handia duela azpimarratu du, aktualizazio asko izango baititu.

Times aldizkariak esaldi esanguratsu batekin amaitzen du bere artikulua: “Urte gutxi barru izango duzu”. Eta seguru hala izango dela. Izan ere, beharrezkoa ez den gailua bada ere, ezinbesteko izango zaigun tramankulua dela dirudi, mundu guztiak bat bahi duelako.