Elhuyar Fundazioak gaztetxoentzako bideo-joko berri bat prestatu du. Armix Baso Magikoan du izena, eta asteazken honetan aurkeztu dute Donostiako Koldo Mitxelena Kulturunean.

Plataformako joko hau 5-8 urteko gaztetxoentzat da; hiru dimentsioko irudiak erabiltzen dituenez, oso erakargarria gertatzen da. Jokalariak Matematikako, Inguruaren Ezaguerako eta Hizkuntzako probak gainditu beharko ditu eremu batzuetan, aurrera egin eta etsaia gainditzeko.

Armix Baso Magikoan serie baten lehenengo bideo-jokoa da, eta datozen urteetan pertsonaia bera erabiliz beste adin-tarte batzuei zuzendutako bideo-joko didaktikoak egiteko asmoa agertu dute Elhuyar Fundazioko arduradunek.www.elhuyar.org/armix web gunean jokoa probatu daiteke.

5-8 urteko gaztetxoentzako ekoizpena da hau, eta, jolasen bidez, jokalariak Matematikako, Inguruaren Ezaguerako eta Hizkuntzako gaiak landuko ditu.

Teknologiari dagokionez, hiru dimentsioko irudiak erabili dituzte, jokoa erakargarriagoa eta ikusgarriagoa gerta dadin. Hala ere, Danel Solabarrieta jokoaren egileak adierazi duenez, “bi dimentsioko ingurunean jolastekoa da —aurrera, atzera, eskuinera eta ezkerrera mugituz—, sistema hori 5-8 urteko haurrentzat egokiagoa da eta”.

 
Elhuyar Fundazioak argitaratuko dituen bideo-joko didaktikoen serie baten lehen CD-ROMa da Armix Baso Magikoan, eta helburua da 2009. urtearen bukaerarako seriea amaituta egotea.

Lehenengo honek 5-8 urteko gaztetxoak hartzen ditu kontuan; hurrengoak 12 urte artekoentzat izango dira. Lehenengo joko honetan, erleei eztia lapurtu dien maltzur misteriotsua aurkitu beharko du Armix izeneko armiarmak; horretarako baso magikoan sartu eta maltzurkeriakideak harrapatu ondoren, azpikeria horren atzean nor dagoen argitu beharko du.

 Horretarako, proba batzuk gainditu beharko ditu eremu batzuetan, eta jokalariak bere jakinduria erakutsi beharko du. http://www.elhuyar.org/armix web gunean, jokoari buruzko informazioaz gain, jokoa probatzeko aukera ere badago.

Elhuyar eta bideo-jokoen ekoizpena

Elhuyar Fundazioak aurreko urtean ekin zion euskarazko bideo-jokoen ekoizpenari. Lehenengo bideo-joko hura aisialdirako izan zen, eta aurten kaleratu duen “Kao: Sumendiko Sekretua” ere bai. Armix Baso Magikoan, aldiz, Elhuyarrek ekoizten duen lehenengo bideo-joko didaktikoa da; eskolan lantzen diren gaiak hartzen ditu kontuan, baina modu atseginean aurkezten dizkio ikasleari.