Animalien portaera ikertzen dutenek galera handia izan dute. Alex, koloreak bereizten zituen eta 30 urtez zientzialariak harritu zituen papagai afrikarra hilda aurkitu dute Massachusettseko (AEB) Brandeis Unibertsitateko laborategian.

Alex 1977an erosi zuen ikertzaile estatubatuar talde batek hegaztien garuna eta portaera aztertzeko. 50 objektu baino gehiago, zazpi kolore eta formak bereiz zitzakeen. Batetik seira zenbatzen zekien eta desioak eta frustrazioa erakusteko gai zen froga zientifikoak gehiegi errepikatzen zizkiotenean.

Gainera, "hitz egin ezazue ondo" esaten zien laborategiko beste bi loroei ikasitako hitzak gaizki ahoskatzen zituztenean.

Unibertsitatearen arabera, bi urteko ume batek duen garapena zuen Alexek eta bost urteko baten burmuina.

Adituek diotenez, papagai batek 50 urte bizi ditzake, batez beste.