Jakina da estatubatuarrek joera eta moda berriak sortzeko eta munduan zehar zabaltzeko duten gaitasuna. Azkena ere badirudi arrakastatsua izango dela, gurasoen artean gutxienez.

Aita eta ama gazteek beren seme-alaba jaioberriei webguneak oparitzea da orain bogan dagoena. Horretarako, jaio bezain laster umearen izena daraman domeinua erosten dute Interneten, hazten direnean erabili ahal izan dezan.

Azken urtean izen eta abizenarekin erregistratutako webguneen kopuruak %400 egin du gora eta orri horietako asko jaioberrien izenean daude.

Webgune bat oparitzea modan dago AEBetan. Izan ere, oso opari merkea da. Bederatzi dolarren truke, sei euro baino apur bat gehiago, "baby"-aren izena daraman .com, .org edo .info domeinua erregistratu eta nortasun digital berri bat lor daiteke. Gainera, luxuzko diseinua nahi dutenek, edozein pertsonaia famatuk nahiko lukeen ataria eduki dezakete urtean 100 dolar ordainduta.