Orokorrean ordenagailuek, baina batez ere disko gogorrek, oporraldi garaiko beroen eragin kaltegarriak jasaten dituzte. Recovery Labs enpresaren arabera, "pertsonak kaltetzen dituen moduan, disko gogorrak jasaten duen stress-ak hondatu egiten ditu makinak". Laborategian egin duten azterketa batzuei esker honako ondorio honetara iritsi dira: Udan gertatzen da ordenagailuen datu galeraren ehuneko 75.

Juan Martos Luque laborategiko arduradunak azaldu duenez, disko gogorra "ordenagailuak duen materialik sentsibleena da" eta beroak kalte handiak eragin ditzake batez ere ordenagailu eramangarrietan. Izan ere, "alde batetik bestera eramaten ditugu eta momentu batean bulego batean gaude 20-22 graduren bueltan eta kalera ateratzean agian 36 graduko tenperaturan jartzen dugu".

Hala, azpimarratu du "informazioaren galeraren eragile nagusia tenperatura aldaketak" direla eta "kontua da enpresa ertain eta handietan gela bereziak daudela zerbitzariak tenperatura egonkor batean mantentzeko". Baina etxeko erabiltzaileentzat zailagoa da hori egitea, ez baitago denon eskura aire egokitua edukitzea.