Izapide guztiak elektronikoki egin beharra duen lehen diru-laguntza programa aurkeztu du SPRIk. Hobeki Digitala izena du eta euskal enpresa txikietan Informazioaren eta Komunikazioaren Teknologiak sustatzeko atera du SPRIk.

Hobeki Digitalaren bidez, gehienez 50 langile dituzten konpainiek diru-laguntzak jaso ditzaketen gastuen %35erainoko laguntzak jaso ahal izango dituzte. Enpresa ertainei %20rainokoak emango dizkiete.

Era horretan, gehienez 12.000 euroko diru-laguntza jaso ahal izango dute enpresek, proiektu bat edo gehiago aurrera eramateko.

Informazioaren eta Komunikazioaren Teknologiak ezartzeko planak edo diagnostikoak egiteko diru-laguntzak ez dira 2.000 euro baino gehiagokoak izango, baina kopuru hori 6.000 eurora arte igotzerik badago.

Programa horretan sartu nahi direnek azaroaren 30a baino lehen euren sinadura digitala aurkeztu beharko dute, SPRIren web-gunearen bidez.

Eskaera sinatzeko ziurtagiri digital hori oraindik ez duten enpresek izenpe.com web-gunean edo 902 25 25 95 telefonoaren bidez eskatu dezakete.