Interneterako konexio azkarrena Suediako emakume batek dauka, segundoko 40 gigabyteko abiadurakoa, hain zuzen.

Orokorrean, segundoko mega bateko abiaduran nabigatu ohi dute ordenagailu gehienek. Hala ere, bateren batek segundoko 40 gigabyteko konexioa dauka... Normala baino 40.000 aldiz azkarragoa! Konexio azkar hori ez dauka, gainera, hacker batek edo informatikari porrokatu batek, 75 urteko emakume suediar batek baizik.

Interneterako etxeko konexio azkarrena du Sibrit Litbergek. DVD batean sartzen diren edukiak bi segundo eskasean jaisteko aukera eskaintzen dio honek.

Litbergek ez du Interneten ibiltzeko zaletasuna aspaldidanik, izan ere, ordenagailua lehenengoz 75 urte zituela erabili zuen. Orain, ordea, etxean instalatutako sarearekin 40 gigabyteko abiaduran nabigatzen duen lehen emakumea bihurtu da.

Peter Litbergen semeak bihurtu du emakume hau ziber-espazioko aitzindari. Peter Interneteko aditua da eta bere konpainiaren teknologia berri bat ezagutarazteko jarri zion konexio azkar hori amari.

Zuntz optikoko kablearekin egiten du lan teknologia horrek eta elkarrengandik 2.000 kilometrorainoko distantziara dauden bi routerren artean datuak zuzenean transferitzeko aukera ematen duen modulatzeko teknika berria darabil.