EAEko enpresa txiki eta ertainen (ETE) %48ri eraso informatikoak egin dizkiete eta eraso horien ondorioz, enpresa horien %2k jarduna gelditu behar izan du.

Horiek dira ETEen Segurtasun Informatikoaren inguruko Europako Txostenak azaltzen dituen datu batzuk. Fundetec fundazioak eta Bilbon egoitza duen Panda Software etxeak (antibirusak egiten ditu) aurkeztu dute txostena Bizkaiko hiriburuan.

Ikerketa Europako 15 herrialdetako 3.000 enpresatan egin da, horietatik 210 Araba, Bizkaia eta Gipuzkoakoak. Arreta berezia jarri da mikroenpresetan (hamar langile baino gutxiago dituztenak), aztertutako enpresa guztien erdia baino gehiago dira eta.
Txostenaren arabera, sistemaren segurtasunari dagokionez, EAEn aztertutako enpresen %56 "oso kezkatuta" agertzen da. Europar Batasunean portzentaia hori %42 jaisten da.

Sixto Heredia Pandako Hedapen zuzendariak azaldu duenez, enpresentzako "mehatxu handiena" ez dira birus informatikoak, software zelatariak baizik. "Isilpean" ordenagailuetako datuak hartzen dituzte eta enpresako jarduera etetea baino galera ekonomiko handiagoak eragin ditzakete.