3 mila milioi pertsona baino gehiagok erabiliko du telefono mugikorra 2007a amaitzerako. Britainia Handiko The Mobile World kontsultorak egin duen ikerketaren arabera, urte hau amaitzerako 3 mila 250 milioi pertsonek erabiliko dute sakelako telefonoa. Hori horrela bada, munduko biztanleria osoaren erdiak baino gehiagok izango du telefono mugikorra.

Txinan, Indian eta Afrikan sakelakoen eskaria geroz eta handiagoa da. Horren ondorioz, asko ari da hedatzen eta hazten telefono mugikorren merkatua.

Urte honen lehen hiruhilekoan bakarrik, 135 milioi kontratu berri sinatu dira munduan. Hau da, minutu bakoitzean mila erabiltzaile berrik ematen du alta sakelako konpainiaren batean.

Lehen mila milioi erabiltzaileetara iristeko, 20 urte behar izan ziren. Bigarren mila milioietara iristeko berriz, nahikoa izan ziren 3 urte eta erdi. Hiru mila milioi erabiltzaileen muga berriz, uztailean pasako da.

Europan, 666 milioi sakelako daude, hau da, biztanleak adina, baina erabiltzaile batzuek bat baino gehiago dute. Beraz, ezin da esan denek telefono mugikorra dutenik.