Espainiako Diputatuen Kongresuaren webgune konpetentzia izango du hemendik aurrera. Diseinuari dagokionez web ofizialaren berbera den web orri bat jarri dute sarean, txisteen bitartez web ofizialaz barre egiteko asmoz. Gainera, Espainiako Kongresua izatetik "Congrezo de los Estafados" izatera pasatu da.

Azkenaldian, Espainiako Diputatuen Kongresuaren web orriak dituen segurtasun akatsen inguruko zenbait informazio zabaldu dira eta "maula-egileen" web orria horren harira sortu da. Web paraleloa ofizialaren parodia hutsa da, diseinu eta argazki berak moldatu eta dena pixka bat aldatuz web orri umoretsua egin dute.

Kongresuaren web ofizialean ganberako diputatuen argazki bat agertzen da. Ez-ofizialean, aldiz, ganberako aulki bat teletubbie batek hartu du. Bestalde, lege-proposamenak ere erabat aldatu eta txiste modukoak egin dituzte: "Lege-proposamena patata poltsek tazo bat ekar dezaten, Lege-proposamena berdinketa ematen denean erpuru pultsuen txapelketa egin dadin, Lege-proposamena Kongrezuaren atsedenaldiko denbora ordu erditik ordu eta erdikoa izatera pasa dadin".

Web orri ofizialaren eta ez ofizialaren artean dauden desberdintasunak ez dira bista-bistakoak, baina edukian arreta pixka bat jarriz gero berehala jabetuko gara dagoen aldeaz. Dena den, onena, bi orriak ikusi eta konparaketa egitea izango da.