"Zure mundua mugikorretik ikusia" horixe zen gaia. Arabako, Bizkaiko eta Gipuzkoako 120 nerabek hartu dute parte bizi diren lekuei buruz sortutako Mobilmetraien lehenengo on-line lehiaketan.

"%100 Ingurune Mobila" ekimenak 350 erabiltzaile dituen komunitate aktiboa sortu du eta zenbaki hau handituz doa egunez egun. Komunitate ugariena gipuzkoarra da, %55’31rekin. Ondoren datoz bizkaitarra, %24’92arekin, eta arabarra, %19’77arekin.

34 lan aurkeztu dituzte Araban, 54 Bizkaian eta 82 Gipuzkoan. Bideoetan azaltzen diren gaiak askotarikoak dira, ia beti umorez landuak eta aisialdiari lotuak. Erabilitako formulak ere askotakoriak izan dira: alegiazko kontaketak, telebista formatua, publizitatea, efektu bereziak, bideoklipa, gizarte-salaketak (oso kasu gutxitan) edo ezkutuko kameraren adar-jotzea.

Euskararen erabilera oso urria izan da eta Araban, adibidez, ez da euskaraz sortutako bideo bakar bat ere aurkeztu.

ingurunemobil.net webgunean ikus daitezke lehiaketara aurkeztutako Mobilmetraia guztiak. Gainera, Mobilmetraia irabazleen artean batzuk aukeratuko dira (irudi-kalitatearen arabera) etb1 eta etb2 kateetako eitbKultura saioan emateko, uztailaren 10etik 15era.

Hauexek dira irabazleak:

 %100 Araba:
“Mobilmetraia onena” sari nagusia: Avanti Abetxuko-ren “Abetxuko d´Or”.
“Euskaraz sortutako Mobilmetraia onena” saria: Hutsik geratu da.
Publikoaren saria: Johanan-en “Vitoriamania_trial_bueno”.

 %100 Bizkaia:
“Mobilmetraia onena” sari nagusia: Efus-cosmos-en "Cruzando puertas".
“Euskaraz sortutako Mobilmetraia onena” saria: MoBiL zAlEaK %100-en "Gure conserje maitea".
Publikoaren saria: Ederra-ren "Shooter".

 %100 Gipuzkoa:
“Mobilmetraia onena” sari nagusia: Aizpea_24-ren “Muelle”.
“Euskaraz sortutako Mobilmetraia onena” saria: Harka-ren “Mus txerriak”.
Publikoaren saria: Las Tequila-ren “Depílate la axila”.