Sasoi betean dagoela dio eta "gauza modernoak" ikasteko irrikan dagoela. Horren adibide, 95 urte bete zituenetik duen bloga. Maria Amelia galiziarra da (Muxia, 1912) eta blogaria, munduko adinekoena.

Radio Euskadiri eskainitako elkarrizketa batean azaldu duenez, berak hitz egin eta ilobak (berak oparitu zion bloga urtebetetze egunean) ordenagailuan idazten du. Denetik kontatzen du Maria Ameliak blogean, Brasilera egin berri duen bidaia, Pasionariaz duen iritzia eta Jose Luis Rodriguez Zapatero Espainiako presidentea gustuko duela.

Munduko txoko guztietako "zaleen" mezuak jaso ditu Maria Ameliaren blogak, "unibertsala naiz", esan du harro. Aitortu duenez, "idazkari bat beharko nuke idazten didaten guztiei erantzuteko". Pozik dago blogariek eman dioten harrerarekin: "Polita naizela esan didate... zimurrez beteta nago eta!". Dena dela, "hainbeste" merezi ez duela azpimarratu du, "badakit amonatxoa pozik izateko egiten dutela, eta benetan, oso pozik nago", agertu du.

Iragarri duenez, "urte askotan" blogeatzen ibiltzeko sasoia du. Zuk zeuk baiezta dezakezu honako helbidean:
amis95.blogspot.com