Eleaniztasunaren ondorioz sor daitezkeen beharrak asetzeko ingeniaritza linguistikoak eskaintzen dituen erremintak aurkeztuko dira gaur Eleka Ingeniaritza Linguistikoak eta Miramon Enpresa Digitalak antolatutako Nazioarteratzea. Eleaniztasuna kudeatzeko erronkak jardunaldian. Ekitaldia Donostiako Miramon Parke Teknologikoan izango da. David Farwell, hizkuntza teknologietan mundu mailako onarpena duen Univèrsitat Politecnica de Catalunyako irakaslea izango da hizlari nagusia.

Jardunaldiaren helburua, eleaniztasuna egoki eta eraginkor kudeatzeko, informatikak eta bereziki, hizkuntz teknologiak eskaintzen dituen baliabideak eta erremintak ezagutzera ematea da.

Saioa, goizeko 9:30etan irekiko du David Farwell-ek, hizkuntza teknologietan aditua, besteak beste, itzulpen automatikoa lantzeagatik eta egun Univèrsitat Politecnica de Catalunyako irakasle dena. Jarraian, José Ramón Pichel-ek (Imaxin|Software), Miguel Silva Gayoso-k (La Voz de Galicia), David Ybarra-k (Tradutek), Declan Grove-k (Translan), Txema Vilches Cuesta-k (Dualia) eta Gotzon Gómez-ek (Irizar) hartuko dute hitza.

Nazioarteratze-prozesua da enpresa eta erakunde askoren garapenaren gakoa etorkizun hurbil batean. Egoera honek, hizkuntza bat baino gehiagotan lan egin behar izatea, eta ondorioz, hizkuntza bat baino gehiago erabili beharra eskatzen du. Horregatik, enpresa eta erakundeetako kudeatzaileei, giza baliabide, nazioarteratze, marketin eta bulego komertzialen arduradunei, webmasterrei eta zerbitzu, komunikazio eta itzulpen-enpresei dago zuzenduta batez ere.