Apple etxeak Safari web arakatzailea Microsoft Windows sistema eragilea duten ordenagailuetan ere erabiltzeko bertsioa kaleratuko du, Steve Jobs konpainiako presidenteak jakinarazi duenez.

Web arakatzaile berriak Microsoften Internet Explorer (erabiltzaileen %78k darabilte, Appleren arabera) eta Mozilla Fundazioaren Firefox (%15ek) izango ditu lehiakide.

Oraingoz, Windows XP eta Vista sistemetarako beta bertsioa dago eskuragarri, doan.

iPhone telefono bereziak ere Safari izango du oinarri. Hau da, arakatzaile horrekin bateragarria den edozein aplikazio iPhonean ere erabili ahal izango da.

Sistema eragile berria, udazkenean

Bestalde, Appleko presidenteak zehetasun gehiago azaldu ditu udazkenean merkaturatuko duten Leopard sistema eragile berriaren inguruan.

Aipatu dituen hamar ezaugarrien artean, adibidez, informazioa kudeatzeko sistema berria eta Microsoften programak Mac ordenagailuetan erabili ahal izateko aplikazioa iragarri ditu.