Gadget zaleek egun hau markatu beharko dute euren egutegian: ekainaren 29a. Sagartxoaren markak kaleratu behar duen sakelako berrizalea jarriko da salgai: iPhone.

Mugikor sinplea baino askoz gehiago izango da Applen telefonoa: iPod, Internet eta beste zerbitzu batzuk izango ditu eskura. Konfigurazioaren arabera, 499-599 dolar (370-445 euro) balioko du gailu berriak. Oraingoz, AEBetan izango da eskuragai baina urte amaierarako Europan saltzea espero dute.

Asko dira Applen azken bikaintasunaren zain daudenak. Aurreratu dutenez, kolorezko pantaila ukigarria (3,5 hazbete) eta 2 megapixeleko argazki-kamera izango ditu. Horrez gain, ez du SIM txartelik izango eta, beraz, ezingo du jabeak ez beste erabili.

Bateria ere ezingo zaio kendu, telefonoa trinkoa baita. Bestalde, hasiera batean behintzat, AT&T telefono konpainiarekin bi urteko kontratua sinatu beharko dute interesadunek.