eitbnet eta Eroski Fundazioa Opentraden sistema hobetzeko elkarlanean arituko dira eitb24.com eta Consumer aldizkariaren bidez. Espainiako Estatuko hizkuntzen artean (gaztelania, katalana, galegoa eta euskara) kode irekiko itzulpen automatikorako sistema aurkeztu zuen Opentradek iaz. Orain, helburua, sistema hori hobetzea da.


Eroskik Consumer aldizkariaren corpusa eta Eitbnet-ek Eitb24 web gunearen corpusak Opentrad kontsortzioaren esku utzi dituzte, itzulpen automatikoan egin beharreko ikerketa-proiektuetan erabil ditzan, Elhuyar Fundazioak jakinarazi duenez.

Helburua corpus horien informazioa erabiltzea da Opentraden bidez egiten diren itzulpenen kalitatea hobetzeko eta itzulpen automatikoaren estaldura areagotzeko, bereziki gaztelaniatik euskarara egiten direnetan.

Transferentzia sintaktikoa du oinarri Opentradek, eta Espainiako Estatuko hizkuntzen arteko kode irekiko itzultzaile bakarra da.

Gaztelaniazko, katalanezko, galegozko eta euskarazko testuak edo dokumentuak itzultzen ditu, baita web orrien edukia ere, nabigatzen ari garela.

Galego-gaztelania hizkuntza-parean bi noranzkoak (galegotik gaztelaniara eta gaztelaniatik galegora) kontuan hartzen dituen itzultzaile bakarra da. Itzulpenen kalitatea, berriz, % 95,2ra iristen da. Gaztelania-katalana parean, % 96,2ra iristen da kalitatea.

Gaztelania-euskara itzultzaile bakarra

Gaztelania-euskarazko pareari dagokionez, itzultzaile bakarra da. Hala ere, azken hori prototipo-mailako tresna baino ez da eta ez du, oraindik, itzulpen komertzialak egiteko kalitaterik bermatzen.

Consumer-en eta eitb24.com-en corpusak itzultzaile horren emaitzak hobetzeko erabiliko dira.

Opentrad kontsortzioa

Hiru enpresa eta lau unibertsitatek osatzen dute Opentrad kontsortzioa: Euskal Herriari dagokionez, Eleka Ingeniaritza Linguistikoa S.L., Elhuyar Fundazioa eta Euskal Herriko Unibertsitateko IXA Taldea daude; Galiziatik, imaxin|software enpresa eta Vigoko Unibertsitatea; Kataluniatik, UPC eta, Valentziatik, Alacanteko Unibertsitatea.