Internetek 60 milioi blog ditu gaur egun, baina zenbaki hori bikoiztu egingo da uztaila aldera.

Logroñoko Actual 2007 ekimenean ezagutarazi dituzte datuak.

Horien arabera, hain zuzen ere, egunero 100.000 blog sortzen dira, eta 1.500.000 iruzkin idazten dituzte.

Adolfo Estalellak hiru fase ezberdindu ditu kaieren arrakastaren bidean:

1. 1999ko abuztua. Pyra Labs konpainiak Blogger plataforma sortu zuen. Horren ondorioz, milioika pertsonek euren kaierak sortu ahal izan zuten, informatikan aditua izan gabe.

2. 2003ko otsaila. Googlek Blogger erosi zuen eta, hortaz, Yahook eta Microsoftek ere blogak egiteko plataformak sortu zituzten, lehia horretan atzean ez geratzeko.

3. Eta, azkenik, 2005eko hasiera. Estalellaren ustez, garai hartan jazo zen blogen booma.

EAEko eta Nafarroako kaiera arrakastatsuenak

Euskal Herrian blogosferako idazlerik arrakastatsuenetakoak ditugu.

Alianzoren sailkapenaren arabera, google.dirson, Borjamari eta Redes Sociales dira Euskal Autonomia Erkidegoan bisita gehien dituzten kaierak.

Nafarroan, aldiz, eCuaderno, Por La Boca Muere El Pez eta Ciencia de Bolsillo.

Euskarazko blogei erreparatuta, Sustatu, IKTeroak eta Faroa dira arrakastatsuenak.

Urtarrilaren 2an eguneratu dute azken aldiz zerrenda.

Eta zuk, bloga ba al daukazu?