Aurkikuntza Britainia Handiko zientzialariek egin dute. Munduko muskerrik handienen espezieko eme bik kumeak izan dituzte arrekin egon gabe.

Espeziea galzorian dagoelako gertatuko ote zen bitxikeria hori? Baliteke, izan ere, naturak oso trebea dela erakutsi du beti. Dena den, badaezpada, gizonak, adi egon zaitezte.

Nature aldizkariak argitaratu du zientzialari britainiarren aurkikuntza. Sexurik gabeko ugalketa prozesua, partenogenesi delakoa, atzeman dute Britainia Handiko zoo banatan arrengandik bananduta bizi ziren espezie honetako bi emerengan.

Flora eta Sungai dira aurkikuntza honen aitzindariak eta ziur aski, bateren baten idolo bihurtuko dira.

Chesterreko (Ingalaterra) zooan bizi den Florak hogeita bost arrautza jarri zituen iragan maiatzean espezie horretako ar batekin egon gabe. 25 arrautzetako hamaika aurrera ateratzeko gai zirela zirudien.

Hiru arrautza alferrik galdu ziren baina gainerako zortziek normaltasun osoz garatzen jarraitu dute eta urtarrilean zabaltzea espero dute, izan ere, espezie horren inkubazio-aldia zazpi eta bederatzi hilabete artekoa da.

Bestalde, Londresko zooan bizi zen Sungaik ar batekin harremanak izan eta bi urte eta erdira jarri zituen arrautzak eta zazpi hilabete geroago jaio ziren kumeak osasuntsu daude.

Liverpooleko Unibertsitate ingeleseko Phill Wattek zuzendutako zientzialariek "aitatasun probak" egin zizkieten eme bien arrautza-multzoei eta kumeen genotipo konbinatu orokorra euren amen bera zela ikusi zuten, beraz, Flora eta Sungai kumeen "aita" eta "ama" ziren aldi berean.