Duela urte bat eta erdi 12 lagun hil ziren Guadalajaran izandako sute bat itzaltzen zeudenean. Ezbehar horretan ez zen inor ohartu haizearen norabide aldaketak sua ere norabidez aldatzea eragin zuela.

Gauza da Irungo (Gipuzkoa) Aerovision enpresak, asko hausnartu ondoren, Fulmar izeneko piloturik gabeko hegazkina asmatu duela, eta oso erabilgarria izan daitekeela mota horretako egoeretan.

Prototipoa edozein kameraz hornitu daiteke. Gainera, kontrolatzen duten tokitik 50 kilometroko erradioan ibili ahal da. Edozein tokitan egon daiteke toki hori, eta abantaila horrez gain, oso azkar prestatu dezakete.

Katapulta baten bidez aireratzen da Fulmar, eta ez du lurreratzeko pistarik behar, sare baten bidez jasotzen dutelako. Gainera, 70 kilometro orduko haizeei aurre egin diezaieke, edozein helikopterok baino gehiago.

Abantaila horiek guztiekin, jostailutxoak aukera asko zabaltzen ditu, suteak kontrolatzearenaz aparte. Eta dena pilotua salbu egonik. Adibidez, arrantza-guneak aurkitzeko, trafikoa kontrolatzeko eta fenomeno meteorologikoak ikertzeko erabilgarria da.