Mina ei da gizakiak pertsona moduan daukan bildurrik handiena, heriotzaren ataria ei da. Minak hartzen gaituenean, ez deutsagu ingurukoari jaramonik egiten, eta minari bi mila buelta emoten deutsaguz. Geure buruari zein zoritxarrekoak garen gogoratzen deutsagu behin eta barriro, eta ahaztu egiten dogu geure min horretatik kanpo be badagoela min gehiago ere.

Aspaldi daukat goizero-goizero eskelak arakatzeko ohiturea. Etxean ikusia umeak ikasia esaten dau esaera zahar batek, eta geure amak hori egiten dau ohetik altxau eta segiduan.

Hilko garela jakite horrek ez nau sekula bildurtu. Baina bada aspaldi buruan bueltaka dabildan kontutxo bat. Eta hiltzen garenean, orduan, zer? Egindako guztiak ez dau ezertarako balioko? Hutsetik hasi eta hutsean amaitzen da.Denporean urrun joan barik, hurbil-hurbileko batek, inoiz esan ez baina asko gure dodan batek, min bizia sentidu eban. Benetako min bizia, minbizia alegia. Berba motza da, itsusia, bermiotarrentzat feue. Baina berbeak dana dino.

Minbizia. Benetako min bizia. Gogorra, latza, egurra sutan jartzen dan beste bizia. Bizitzaren mina dala esango neuke, baina gurean suertea euki dogu. Orain arte minbizia bizitzaren mina izan da, ezin esan geinke biziaren muina izan danik. Min hutsean geratu da, bizia baina mina, ez muina. Ez dogu eskelen beharrik euki.

Holakoetan geure amamak Jangoikoari emoten deutsoz eskerrak, baina minbizia euki eta radioak, kimioak eta bestelako beste hainbat sesinok izten dituezan min biziak ezin alde batera itzi.

Geurea; teknologia, zeintzia eta ikerketaren mendea ei da. Genomak, klonak, saguekaz esperimentuak… egunero agertzen dira telebistan ikerkuntza barriak hasi dituezan ikerlariak, hau edo beste osatzeko balizko edabe magikoak…

Honeek lerroak idazten hasi nazanean, kursoreagaz behera egin eta apurka-apurka, berba bat bestearen atzean irakurrri eta negar-anpuluak be bata bestearen atzetik jausteko ametsa euki dot. Zagozien lekuan za

 

goziela, negar-anpuluak urten arazoteko intentzinoa euki dot, baina ezin.

Minbizi madarikatu horrek min bizia sortzen dau doan lekura doala. Min bizia, gorroto bizia, amorru bizia. Bizitzen jakin behar da baina.

Minbizia min bizia da; bai!! bizi-bizia, baina bizi-mina badago, hor konpon minbizia, min bizia eta biziaren mina!

Bizi koño, bizi…

Merci zeure hospitaleko gela hotzera sartzen itzi eta minbiziaren min bizia hurbiletik ezagutzeko aukera harengaitik, baina batez be, merci zeure bizi-minaren indarra danori erakutsi eta kutsatzeagaitik.

That´s for you! Good luck!