Behinola lagun batek parrandan gengozala zera idatzi eustan paper zatitxu baten: "Maitasuna plaga bat da, hiltzen izten ez deustana".
Aspaldi ez naz lagun haregaz ibili, eta beraz, aspaldion ez dot haren moduko altxorrik entzun.

Maitasuna gitxitan heltzen da geurera. Gitxitan daukagu maitasuna aurrez aurre ezagutzeko aukera. Danok ezagutzen dogu baina entzunean bakarrik. Danok entzun edo ikusi dogu nonoiz etxeko lehiotik haratago maitasunaren inguruko konturen bat, baina guri gitxitan etorri jaku bisitan.

Maitasunak behin baino ez  ei dau etxeko aldabea joten. Kolpetxu bakarra emoten ei dau, bakarra baina luzea, eta adi egon behar! Ez da ona be etxeko atarian geldi-geldi egotea, nor sartuko zain. Gitxien espero dogunean heldu ei da.

Nire etxeko ateak aldabea nahiko ahul dauka, zahartuta, sitsak janda… baina egunen baten helduko da arotza. Aspaldi deitu neutsan aldabea konponduteko enkarguagaz, baina badakizue, holakoetan geldo-geldo ibilten dira, tartetxuren bat atarako dau eta orduantxe etorriko da. Ahal dauenean...

Artean, ni etxoten. Etorriko ete da? Nik egin dot nire “txapuzatxue” eta untze pare bategaz aldabea zutunik mantendutea lortu dot; sikeran maitasuna ate joka badator, kolpea entzun eta atea zabaltzeko.

Behin entzun neban kolpetxoa, eta izuak hartuta, ateko zulotxutik so egin eta kanpoan ikusten nebana gustau, eta zabaldu egin neban.
Hasieran kontuz ibili banintzen be, gerora arrisku guztiak alde batera itzi eta indarrez hartu neban aurrez-aurre neukana.

Orain patuak urteotan ereindako maitasun aleak errotik atara dauz. Bataran bat ondino ortuan dagoalako ametsagaz sartzen naz egunero ohera, baina egunotako haizeteak ale guztiak eroan ei dauzan bildurrez nabil.

Ondo ereindako hazia ez ei da errez usteltzen, baina beti dagoz hazi errebeldeagoak; lur barruan ondo egon eta kanpora urten gura ez dabenak.

Ez zaiteze  egon beti aldabea joko deutsuela eta, etxoten. Itxi zeuen etxeko atea, urten kalera eta ausartu zaiteze zeuek aldabea joten.

Kontu kontari ibiltea erabaki dot gaurkoan, baina jakin zeuek be kontetako kontuek kontau gure badozuez, Milekontun tartea daukazuela.