Leire Olaberria dominaduna izango da astearte honetako "Ni Hao Txina"ko protagonista. Kamarek bere egunerokoa erakutsiko dute 20:55etatik aurrera ETB-1n. Pista txirrindularia da Leire eta puntuazio proban brontzezko domina irabazi berri du.

Esan daiteke txirrindularitza munduan hasiberria dela Leire; 31 urte ditu eta duela bost urte hasi zen bizikleta gainean korritzen. 25 urte egin arte atletismoan aritzen zen; 100 metrotan Espainiako errekorra du Kadete mailan, baina bere mutil lagunak bizikletan aritzeko dohainak ikusi zizkion eta pistan ibiltzera animatu zuen.

Beraz, nahiz eta berandu hasi kirol honetan, gipuzkoarrak berehala hartu zion neurria bizikletari eta lehiarako doaiak erakutsi ditu. Hala ere, teknika eta estrategia bereziki landu behar izan ditu.

Peraltean ibiltzea ez da bat ere erraza, eta hasiera gogorra izan bazen ere, gogotik entrenatu eta munduko txirrindulari onenen artean sailkatzea lortu du. Aurten, laugarren izan da munduko txapelketetan eta lorpen horri Beijingeko jokoetako brontzezko domina gehitu dio orain.

Judas Arrietak berriz, Beijingo tokirik turistikoenak erakutsiko ditu; Tian Amen plaza eta Hiri Debekatua, hain zuzen ere. Tian Amen plaza azken urte hauetan Txinan izan diren gertakari politiko garrantzitsuenen lekuko izan da eta Hiri Debekatua garai bateko enperadorearen jauregi erraldoia zen. Judasek bi leku hauen berri emango du.