Gorlizera joko du aste honetan "Hik Jan eta Nik Jai" saioak. Bertan paella txapelketa egiten da urtero urtero herriko jaietan, eta aurten bere 48. edizioa bete du. Goiz-goizetik ehundaka pertsona biltzen da bertan lekua hartu, sua egiten hasi eta pixkanaka pixkanaka paella prestatzen joateko.

Eguraldia lagun zutela, 80 paella baino gehiago aurkeztu dira aurten lehiaketara, zein baino zein goxoagoak. Beraz, txapela lortzea ez da batere erraza suertatu. Lehia horretan bete betean sartuta, Elizondokoak egongo dira. Ritxi eta Joseba.

Aste honetako protagonistek hainbat urte daramatzate lehiaketa honetan parte hartzen eta inoiz txapela ere lortu dute. Garaipena errepikatuko dute aurten? Beraiek, badaezpada, zorte ona ematen dien paella ontzia erabili dute sukaldatzeko.

Jai giro paregabean murgilduta, gorliztarrek euskal sukaldariak ezagutzen dituzten ala ez jakiteko aukera egongo da. Arguiñano, Berasategi, Arzak...sukaldari handi ugari daude Euskal Herrian, baina ezagutzen al ditugu guztiak benetan? Ezuste bat baino gehiago hartuko dute ikusleek.

Horrez gain, Iñaki Sanz aste honetako sukaldari gonbidatua izango da. Iñakik paella on bat egiteko aholkuak emango ditu.

Eta paella laguntzeko ez dago errezerbako ardo on bat baino gauza hoberik. Ardo on eta hain ez onaren artean ezberdintzen jakingo al dute gorliztarrek...

Galdera guzti hauen erantzuna eta sorpresa gehiago, Igandean 22:00etatik aurrera, ETB-1en.