"Ni Hao Txina" egunero izango da ikusgai ETB-1en astelehenetik aurrera. Txinako Joko Olinpikoak abian dira eta bertan lehian ari diren euskal kirolarien prestaketa berriro ikusteko aukera izango da abuztuaren 11tik aurrera.

Asteleheneko saioan Xabier Fernandez eta Iker Martinez regatistak izango dira protagonista nagusiak. Hauek urrezko domina irabazi zuten duela lau urte Atenasko jokoetan, 49er izeneko belauntzi klasean. Aurten ere domina bat lortzea da euren helburua eta horretarako gogor ari dira entrenatzen Santanderko errendimendu handiko zentruan. “Ni Hao Txina”ko kamarak Santanderrera hurbilduko dira bi txapeldunen entrenamendua gertutik segitzeko asmoz.

Judas Arrietak berriz, Beijinen nola ibili azalduko du. Beijing hiri kaotiko samarra da. Oso urte gutxirarte txinatar guztiak bizikletan ibiltzen ziren, baina hazkunde ekonomikoaren ostean, gero eta auto gehiago ikusten dira. Egun 3.000.000 bat auto omen dabil Txinako hiriburuko kaleetan. Hiri erraldoi honetatik nola mugitu jakiteko, erabili daitezkeen garraiobide desberdinetan ibiliko da Judas.

Asteartean, Asier Maeztu

Astearte honetan, berriz, Asier Maeztu txirrindularia elkarrizketatuko dute. Atenasko olinpiar jokoetan brontzezko domina irabazi zuen pistako txirrindularitzan eta aurten 2004ko marka berdindu edota gainditzea du helburu; domina bat lortzea, hain zuzen ere.

Txirrindulari bikaina izateaz gain, Asier oso sukaldari trebea da eta sukalderako dituen doahiak ere agerian utziko ditu saioan, plater bikain bat prestatuz.

Judas Arrietak, bestalde, munduko monumentu ezagunenetako bat bisitatuko du, Txinako Harresi Handia. Duela ehundaka urte, txinatarrek, atzerritarren inbasioetatik babesteko eraiki zuten harresia, eta Judasek garai haiek ekarriko ditu gogora eta egun harresia zertan den erakutsiz.

"Ni hao Txina" astelehenetik ostegunera 20:55etan izango da ikusgai ETB-1en.