Azpeitiko lehen bakailo txapelketaren lekuko izango da aste honetan "Hik jan eta nik jai" saioa. Azpeitiko jaiei freskotasuna eta berrikuntza gehitu nahian antolatu dute lehiaketa eta bertan 18 bikotek hartu dute parte. "Hik Jan eta Nik Jai"k lehiaketa gastronomiko honen nondik norakoak gertu-gertutik ezagutuko ditu. Antolatzaileek bakailoa, sua eta mahaia jartzen die parte-hartzaile guztiei eta bakailo onena zein den erabakitzea ez da batere erraza izango.

Javi eta Jonekin, Saltseruek kuadrilarekin, pil pil bakailoa nola egiten den ikusiko dute. Beraiena izango al da Azpeitiko pil pil erako bakailorik onena? Javi eta Jonek urte ugari daramatzate sukaldari lanetan, baina lehiaketan aurkitu duten maila ez da batere samurra.

Besteak beste, Koldo eta Fernadorekin lehiatu beharko dira. Bi hauek ere soziedadean sukaldari lanetan ibiltzen ohituta daude, hala ere, pil-pil erako bakailoa egiteko errezeta bila internet eta liburuetara jo behar izan dutela onartzen dute.

Balioko ote die bi hauei horrenbeste dokumentatzea? Sekretu eta trikimailu ezberdinik ikasi ote dute? Galdera horri Azpeitin bildutako sukaldari batek baino gehiagok erantzungo dio aste honetan.

Gainera, Iñausti jatetxeko Alfredo Arretxeak sukaldariak benetako pil pil erako bakailao on bat egiteko aholkuak emango ditu aste honetan.