"Hik jan eta nik jai" saio berria estreinatuko dute uda honetan Euskal Telebistaren lehenengo katean. Saioaren helburua gastronomia eta jai giroa uzatartzea izango da. Euskal Herriko hainbat txokotan, udan batez ere, gastronomi lehiaketak jaietako egitarauaren parte izaten direnez, herriz herri ibiliko dira, iraila bitarte, "Hik jan eta nik jai" saioko lagunak. Karlos Lozanoren gidaritzapean, Baleuko ekoiztetxeak ETBrentzat eginiko saioa izango da. Kaittin Allenderen ahotsa izango da ikusleak txokoz txoko gidatuko dituena.

Gertu-gertutik jarraituko dituzte gure herri, hiri eta auzoetako jaietan koadrilak zartagin edota kazola inguruan bilduko dituzten ekitaldiak. Lehiaketa hauetan parte hartzen duten lagun taldeen lana ezagutuko dute, beraiekin batera jai giroan sartuz. Platerak nola prestatzen diren ikasiko dute, ikusleei errezetak eskainiz, eta epaimahaikideekin ere hitz egingo dute, aurkeztutako jaki guztien artean hoberena zein den aukeratzeko erabiltzen dituzten irizpideak ezagutzeko.

Horretaz gain, lehiaketa hauek bukatu ostean partehartzaileekin parrandan jarraituko du erritmo biziko saio umoretsu honek, euskal jaigiroan erabat murgilduz.

Uztailaren 6an Mungian ospatuko den Sukalki Eguna izango da lehenengo saioko protagonista. Jai honen nondik norakoak azalduko dituzte, bertan izaten den giroaren berri emanez. Ondorengo saioetan, Getxoko Aixerrotako paellak eta Gorlizko Andra Mariko paellen inguruko jai giroa ere ezagutuko dituzte, besteak beste.