Gazteen elikatzeko ohiturak eta biharamuneko ajeari nola aurre egin izango dira "Jatearen Egiak" saioak ostiral honetan, 21:25etatik aurrera, izango dituen hizpidetako batzuk. Konkretuki, gazte talde bati jarraipena egingo diote parranda batean murgilduta. Alkoholak eta tabakoak beraiengan daukan eragina ikusi eta biharamunean pairatuko duten ajearen lekuko izango dira.

Diego eta bere lagunak trago batzuk hartu eta afaltzera doaz. Ondoren, edaten jarraituko dute gauak aurrera egin ahala. Hurrengo goizean, ajea sufrituko dute. Zer da zehazki ajea? Nola adierazten da gorputzean? Hainbat jakik honi aurre egiten lagun dezaketela konprobatuko dute ikusleek. Argibide zientifikoak Bittor Rodriguez nutrizionistak emango ditu.

Gainera, "Jatearen Egiak"en atal berri honetan antioxidatzaileen onurak ezagutuko dituzte eta garbiketa dieta bati helduko dioten neska batzuen esperientzia ere kontatuko dute.

"Jatearen Egiak" saioak BBCko elikaduraren inguruko programa bat dauka oinarri, non hainbat esperimentu egin diren ehunka boluntario eta adituekin. Ikerketa hauekin batera, Euskal Herrian bertan ekoiztutako erreportajeak ikusiko dira, gure inguruko protagonista batzuen elikadura ohiturak eta mediku desberdinen iritziak jasoz.