Egungo gizartean aurki daitekeen arazoetako bat, zoritxarrez, gertatzen diren hainbat irain eta sexu erasoren irudiak Internet bidezko negozio zikinerako erabiltzea da, dudarik gabe. Arazo hau islatuko dute ETB-1eko “Goenkale” telesaileko hurrengo asteko ataletan. Kevin izango da arazo hau ikertu eta salatuko duena.

Izan ere, aurreko denboraldi bukaeran jasan zuen eraso bortitza sarean zintzilikatuta dagoela jakingo du. Kevinek, Urkoren laguntzaz baliatuz, bere anaiorde Josuk eta haren lagun Saguk eskuartean darabilten negozioa zein den ikertuko du, eta hariari jarraituz, Rakelek jasandako bortxaketarekin ere zerikusirik badutela konturatuko dira.

Kevin beldur da Mirari ere Josuren joko zikinean eroriko ote den, eta Josuren aukako frogak aurkitzen saiatuko da. Asier eta Milena ere, nahigabe, gai honetan nahastuta gertatuko dira.

Leonorrek, bestalde, bere arazoek irtenbiderik ez dutela ikusiz, guztiz alde batera utzi eta Milenarekin bidaia bat antolatuko du, bien arteko harremana estutzeko asmoz.

Markel, bere amonaren gaixotasunaren larritasunaz eta horrek ekar ditzakeen ondorioetaz jabetzean, guztiz indargabetuko da.

Eta Rakelek ezin du egoera gehiago jasan. Josuk berarekiko duen jarrerarekin nahikoa ez, eta Josu eta Mirariren arteko harremana ezagutzeak lur jota utziko du.

“Goenkale”, astelehen eta asteartean, 22:05ean, ETB-1en.