Astearte gaueko dokumentalaren tartean, bideozaintzaren fenomenoa izango dute aztergai astearte honetan, ETB-1en, 23:05ean. Mundu osoko mugimenduak kontrolpean daude. Azken urteetako atentatu terroristek eta nazioarteko gatazka politikoek herritarren artean beldurra areagotzea ekarri dute. Lehen munduko herrialdeak Beldurraren gizarte bilakatu dira. Ongizatea bermatzeko segurtasuna eskatzen da.

 Zelatatuak gaude. Etxetik irteten garen unetik ohera sartzen garen unera arte, behin, hamar edo ehun aldiz izaten da monitarizatua gure irudia, kamera kontrolatzaile baten begiek gure mugimenduak ikusten dituen bitartean.

Zenbat kamera daude Euskal Herriko kaleetan? Non dago segurtasunaren eta askatasunaren arteko muga? Nork eta nola mugatzen du kameren instalazioa? Nork kontrolatzen ditu irudiak? Noiz dakigu zaintzapean gaudela eta noiz ez? Zer egiten da grabatzen diren irudiekin?

Galdera horiek guztiak Roman Intxaurtieta Datuak Babesteko Euskal Bulegoko abokatuari, Jose Luis Goñi Sein La videovigilancia empresarial y la protección de datos personales liburuaren egileari, eta Jon Uriarte Ertzaintzako zuzendariari egin dizkiete.

Dokumentalaren egileek, errealitatera gerturatu asmoz, amu bat jarri dute Euskal Herriko denda, garraio zerbitzu eta kaleetan dauden bideozaintza kamerek hari nola jarraitzen dioten erakusteko.