Asteazken honetan, Xabier Euzkitzek ETB-1en aurkeztutako “Kalaka” saioan, elizak politikagintzan jokatzen duen papera aztertuko dute. Oraindik martxoko hauteskundeetarako atarian baino ez bagaude ere, badakigu kanpainan zeintzuk gai bilakatuko diren punta-puntakoak, eta horietako bat estatua eta elizaren arteko harremana izango da. Azken egunotan Espainako Apezpiku-batzarrak, botoa ematerako orduan kontutan hartu beharrekoak azaldu ditu egindako agerraldi batean. Besteak beste, "terroristekin eseri direnei" botoa ez ematea eskatu du.

Adierazpen hauek kontrako eta aldeko erreakzioak piztu dituzte: batzuek politikagintzan gehiegizko eskuhartze bezala interpretatu dute, besteentzat, aldiz, adierazpen askatasunaren ondorio baino ez dira adierazpen hauek.

Bestalde, Mario Izeta gernikarra Bilboko Gotzain laguntzaile izendatu du Vaticanok. Aditu batzuen iritziz izendapen honek euskal elizaren eta abertzaletasunaren arteko lotura hausteko asmoa du. Abertzalea al da euskal eliza? Eta horrela bada, desabertzalizatu egin beharko al litzateke?

Aste honetan, mahaian eserita Joseba Arregi irakaslea, Markos Zapiain filosofo kontenplalaria, Txema Auzmendi kazetaria, Inazio Azkoaga apaiza, Arantxa Urretabizkaia idazlea, Juan Mari Juaristi GBBko lehendakari ohia eta Arantxa Azurza abokatua izango dira.

Horretaz gain, Iñigo Agirrek aurkezten duen Bolo Bolo tartean eskoletako soinketa orduen murrizketaz hitz egingo dute, besteak beste. Lierni Agirrezabala erreportaria gorputz heziketako irakasleekin izan da Lakuan, kurrikulum berriak ezartzen duen soinketa ordutegiaren kontra egin duten manifestaldian.